香港買貓 Checklist｜落訂前要問清楚嘅 12 件事
由品種、性格、健康、疫苗、合約、接貓安排到家居準備，呢頁唔係叫你買邊隻，而係俾你一套到任何貓舍都可以用嘅核對方式。
落訂前，最少要答到 4 句
- 我揀緊邊一隻 BB？
- 佢而家健康／疫苗進度係點？
- 我今次付款實際留緊咩？
- 幾時接、接嗰日會攞到咩？
真正嘅買貓流程係「生活 → BB → 文件 → 留位 → 接貓」
最常見嘅錯誤係俾一張相吸引，先落訂，之後先問自己屋企啱唔啱。穩陣啲嘅次序係：先定生活條件 → shortlist 品種 → 睇實際 BB → 核對健康同合約 → 最後先付款留位。
生活
時間、毛髮、家庭、預算。
實際 BB
性格、步姿、精神、互動。
文件
疫苗、健康、晶片、合約。
留位
全部清楚先付款。
落訂前要問清楚嘅 12 件事
先定你屋企不能妥協嘅條件
每日有幾耐冇人、想幾多互動、接受唔接受長毛、屋企有冇小朋友／其他寵物、長期預算。先定生活，再揀品種。
Shortlist 品種，但唔好當品種＝性格
用品種縮窄範圍，再睇實際 BB。英短唔一定唔黐人，布偶亦唔一定任抱。
確認實際 BB 年齡、性別、毛色
落訂前最好將 BB 名／ID、生日或年齡、性別、毛色寫入正式確認，避免之後講法唔同。
疫苗：問第幾針＋日期
唔好只接受「有打針」。要知道而家第幾針、幾時打、接貓前會完成咩、下一步幾時。
驅蟲、體檢、已知醫療紀錄
問最近一次驅蟲／檢查，同有冇曾經需要處理嘅眼鼻、腸胃、皮膚或其他問題。
晶片、來源、父母／pedigree
如果你重視血統，問父母、可追溯資料、該 BB 實際有咩文件；唔好將「貓舍有 CFA/TICA」理解成每隻 BB 文件完全一樣。
現場試互動，而唔係只睇最主動
坐低、摸、抱、放返落地、用玩具，睇恢復速度同佢會唔會再返嚟。
問清貓價實際包括咩
疫苗、晶片、Gift Pack、文件、交接安排係咪包括；寄養、美容、延後接貓等額外服務再點計。
訂金／留位規則
金額、可否退、咩情況例外、留位幾耐、正式 hold 係一隻定多隻，要喺付款前清楚。
健康保障點處理
保障幾耐、一般小病／嚴重疾病／先天問題有咩分別、需要咩獸醫文件、發現問題應點通知。
接貓日期同未完成安排
BB 係咪已適合交接？仲有疫苗？如果你旅行要延後，照顧安排同收費點計？
交接日到底會攞到咩
疫苗紀錄、晶片／相關資料、健康／醫療紀錄、合約、現時飲食、日常照顧重點，逐樣對一次。
「有齊」唔夠，資料最好要可以逐項對
| 對方講 | 你可以追問 | 點解 |
|---|---|---|
| 「疫苗有齊」 | 而家第幾針？日期？接貓前會唔會完成三針？ | 直接影響你接貓後醫療時間表。 |
| 「父母健康」 | 針對呢個品種有咩資料／檢查可以睇？ | 避免一堆 generic testing 取代真正相關資料。 |
| 「有保養」 | 幾多日？小病／嚴重病／先天問題點分？ | 出事時先唔會先發現雙方理解完全不同。 |
| 「價錢全包」 | 三針疫苗？晶片？Gift Pack？額外寄養？ | 比較總價時先知道其實比較緊同一樣嘢。 |
到店 15 分鐘，做一次真正有用嘅性格測試
先坐低唔捉佢
睇佢會唔會自己接近、望你、聞你或者停喺你附近。
由職員示範抱起
睇身體放鬆程度、會唔會極度驚慌，以及放低之後幾快恢復。
同一玩具比較
唔同 BB 用同一刺激，先容易睇到玩心、專注同興奮程度。
問平時，而唔係只睇今日
今日可能啱啱瞓醒；平時食慾、同貓相處、被抱、剪甲反應更有參考價值。
付款前最後 4 個 Decision Check
可以落訂
BB 狀態合理、資料齊、合約睇過、屋企人同意、接貓安排清楚。
等一等
仲有健康／條款未問清，或者純粹被「今日先有」壓住做決定。
換另一隻
品種啱但個體互動唔啱，唔需要因為已經到店就勉強。
先唔好買
時間、住屋、預算或家庭條件未 ready，等準備好通常更省事。
接貓前 48 小時，只需要準備真正必要嘅嘢
唔需要一口氣買晒成間寵物店。第一星期重點係穩定同可觀察。
原本食開嘅糧
唔好接貓第一日同時轉環境＋轉糧。
砂盆＋原本習慣嘅砂
頭幾日先減少變數，之後先慢慢轉。
安全空間＋外出籠
有一個安靜範圍，方便留意食、飲、尿、便。
而家未有合心水？唔需要為咗「怕冇」亂揀
如果你只係等某個品種返，可以免費登記 New Kitten Alert；如果你對品種、性別、顏色、性格已有明確要求，先再了解 Preferred Match 公開前 Private Preview。
常見問題
買貓最少要預幾多錢？
唔好只預貓價。首月用品、長期主食／貓砂、絕育、醫療預備金同可能嘅保險都應該一齊計。
第一次養貓係咪一定揀英短？
唔係。工作時間、毛髮接受度、互動期待同實際個體性格，比「新手必選某品種」更重要。
落訂之後先睇合約得唔得？
唔建議。你最介意嘅退款、健康保障、交收日期等，應該付款前已經睇清楚。
資料來源與下一步
最後更新：2026-08-24