貓咩情況要即刻睇獸醫？

養貓之後一定會 Google。「貓突然唔食」「貓嘔黃色水」「貓眼瞇住」「貓不停去廁所」——Google 可以幫你理解發生緊咩，但有啲情況唔適合一路 search 到凌晨三點先決定去唔去醫院。

呼吸有問題

貓平時唔應該好似狗咁長時間張口喘氣。如果見到明顯張口呼吸、呼吸好用力、胸腹大幅度起伏、牙肉或者舌頭顏色異常，或者隻貓完全唔肯郁只顧呼吸，當 urgent situation 處理。

唔需要先拍十條片逐個 group 問。

排唔到尿

呢個值得再講一次，因為新手真係好容易當成便秘。不停入砂盆、蹲好耐、每次冇尿或者只得幾滴、叫、舔下體，尤其公貓，應該儘快求醫。

食咗唔應該食嘅嘢

藥物、清潔用品、百合、繩、絲帶、橡筋、針線、細小玩具，如果你見到或者高度懷疑吞咗，唔好純粹等便便排出。亦唔好自己亂催吐。

突然 突然倒低、抽搐、企唔穩

呢啲唔係「觀察一晚」嘅症狀。同樣，如果突然非常虛弱、叫極反應都好差、嚴重出血或者有明顯創傷，都應該直接處理。

去獸醫之前可以做咩？

唔使花半個鐘整理一份報告先出門。最有用係記低大概幾點開始、有冇食過異物或者藥物、最近食過咩、嘔過幾多次，有相片或者影片就帶埋。

如果懷疑中毒，產品包裝或者植物相片都拎埋。有 Mewday 紀錄嘅話，可以直接俾獸醫睇最近體重、飲食、疫苗、驅蟲同健康 timeline；但如果真係急症，唔好為咗補齊紀錄而拖延出門。

有啲問題適合慢慢研究。急症唔係其中之一。