新貓幾時可以放出房？

「幼貓已經喺房入面好悶喇，可唔可以放佢出嚟？」去到第二、三日，好多主人就開始問。

答案唔係固定「第幾日」，而係睇幼貓本身準備好未。如果幼貓已經正常食飯、正常用砂盆、喺原本個空間 行動自然，見到你亦唔再成日即刻縮走，就可以開始逐少增加活動範圍。

相反，如果幼貓連原本個房都仲未敢行晒，就冇必要因為「已經第三日」而突然開放全屋。

點樣開始最好？

最簡單唔係一下子全屋任行，而係開多一個相連空間。例如本身喺睡房，可以先開房門俾幼貓自己睇走廊或者客廳。第一次唔使抱出去，等佢自己行。

幼貓出去五分鐘又返入房，完全冇問題。原本個房最好暫時繼續保留做 familiar base，等佢知道就算出面有啲驚，仍然有地方可以返。

砂盆要唔要跟住搬？

最初唔建議突然將唯一一個砂盆，由幼貓已經熟悉嘅位置搬去屋企另一邊。如果長遠想將砂盆放去其他地方，可以等幼貓適應全屋之後再慢慢處理；又或者擴大活動範圍嗰段時間，先加多一個砂盆喺新 area。

對一隻啱啱識路嘅幼貓嚟講，「我知道屋企有砂盆」同「我急嗰陣搵得到個砂盆」係兩回事。

夜晚可唔可以任幼貓周圍行？

先問一個更實際嘅問題：你間屋已經 kitten-proof 到可以喺冇人睇住嘅情況自由行未？如果窗、電線、細小物件、植物同危險罅位全部搞好，而幼貓亦已經熟習環境，可以慢慢增加自由度。

如果你仲未放心，夜晚暫時留返幼貓喺安全空間 完全冇問題。

主人返工點算？

唔使因為接咗貓，就連續幾個星期唔敢出門。反而頭幾日可以開始建立正常作息。由短時間離開開始，確保有水、食物、砂盆、安全休息位，同埋冇危險物品。

有啲主人放假接貓，頭三日 24 小時黐住；到星期一突然消失十個鐘，對幼貓嚟講反而又係另一個大轉變。你本身生活係點，就慢慢俾幼貓適應嗰個真實生活。

第一個星期嘅目標唔係「解鎖全屋」，係令成間屋慢慢由陌生地方，變成幼貓熟悉嘅生活範圍。