PART 03｜每日真正會遇到嘅事 · Chapter 07
幼貓點轉糧先唔易軟便？
點解「7 日轉糧法」唔一定適合每隻貓
網上講轉糧，最常見就係 Day 1–2 舊糧多、新糧少，之後慢慢 50/50，再變成全新糧。個 concept 冇錯，但最容易令人誤會成：「照張圖行足七日，就保證唔會軟便。」其實唔係。
轉糧速度要睇幼貓，而唔係只睇 calendar
有啲幼貓三四日已經完全冇問題，有啲要一星期甚至更慢。如果一加新糧就開始明顯軟便，你唔需要因為「今日已經 Day 4」而繼續加比例。
停一停，或者退返少少，先睇腸胃反應。
剛接返屋企，通常唔係最急住轉糧嘅時候
如果原本嗰款食物冇問題，頭幾日先照食係最簡單。搬屋本身已經可以影響胃口同腸胃。如果同時轉食物，之後出現軟便，你好難知道係 stress、食物，定其他健康原因。
等幼貓 settle、食慾同便便穩定先開始，通常清楚好多。所以原本食緊嗰包糧就快完，先補返同一款會比「咁啱食晒，不如今晚直接轉」穩陣。
「我溝埋一碗，但幼貓淨係揀舊糧食」
正常。有啲貓非常識揀。如果新糧混咗落舊糧之後，幼貓搞到成碗都唔食，就唔好為咗完成轉糧 plan 而餓佢。可以減慢比例，甚至分開兩個小碗慢慢介紹。
軟便一次，要唔要即刻停止？
睇程度。如果只係一次比平時軟少少，但精神、胃口全部正常，可以先觀察，同時放慢轉糧速度。
如果變成持續水瀉、有血、反覆嘔吐、唔食或者精神差，就唔好再當「普通轉糧反應」。幼貓持續腹瀉尤其要小心。
MEWDAY健康紀錄記低轉糧日期、比例、體重同腸胃變化，之後會比靠記憶清楚好多。
開啟 →新糧明明貴啲、成分好啲，點解唔可以即刻換？
因為腸胃唔會睇價錢。你覺得新糧 better，唔等於幼貓個腸胃可以一晚之內適應完全唔同嘅蛋白來源、脂肪比例、纖維同配方。「好糧」同「適合今日即刻轉」係兩件事。
轉糧最怕心急。唔需要追住一張七日圖，睇便便、胃口同幼貓本身，先係真正 timetable。