接貓前要準備咩？
第一次接貓前幾日，好多人都會開始瘋狂買嘢。貓床買咗、玩具買咗、抓板買咗，去到接貓前一晚仲會不停諗：「係咪仲漏咗啲咩？」
其實準備得好，唔等於買得多。頭幾日最重要嘅係，幼貓返到屋企之後有地方食、有乾淨水飲、有廁所去、有位休息，同埋屋企冇一啲明顯危險位。大型貓爬架遲幾日到，真係冇乜所謂。
第一日，唔使即刻開放成間屋
如果屋企有一間比較安靜嘅房，可以先俾幼貓喺入面 適應。冇獨立房都唔緊要，香港好多屋企本身唔大，可以喺睡房或者客廳劃一個比較安靜嘅位置，先俾佢熟習。
入面有食物、水、砂盆、抓板、一兩件玩具、休息位，同一個可以匿埋嘅地方，已經夠。唔需要第一日就抱住幼貓逐間房參觀。有啲貓一出 carrier 已經周圍探索，有啲就會先坐低望好耐，兩種反應都可以正常。
等幼貓喺第一個空間食飯、去廁所同休息都開始穩定，再慢慢俾佢行多啲地方會容易好多。
有地方俾幼貓匿，反而會安心啲
好多新手一見隻貓匿埋，就會即刻驚：「係咪唔鍾意我？」於是接貓前特登將所有可以匿嘅地方封晒。
危險嘅罅隙當然要封，例如雪櫃後面、洗衣機後面或者你完全伸唔到手入去嘅位置。但「唔俾幼貓走入危險地方」同「完全唔俾佢有 可以匿埋嘅地方」係兩回事。
紙箱、半遮住嘅貓床、carrier，甚至安全嘅枱底都可以。幼貓想自己靜一陣時，有地方退開，往往比被迫留喺房中間更加容易放鬆。
食物、水同砂盆唔好全部黐埋一齊
有啲新手為咗整齊，會將糧碗、水碗同砂盆一條直線排晒喺牆邊。唔建議。最少唔好將食物、水同砂盆全部迫喺同一個角落。空間容許嘅話，水碗亦可以同食物分開少少。
唔使拎尺量距離，個概念只係：食飯、飲水、去廁所，本身就係幾樣唔同嘅生活需要。
最簡單答案係：乾淨、適合飲用嘅水。屋企平時飲濾水，就可以俾濾水；屋企習慣將水煲過，就放涼之後俾貓。唔需要特登買所謂「寵物專用水」。
水喉水亦唔應該簡化成「所有貓一定唔可以飲」。最容易理解嘅做法係：屋企平時俾人飲邊種水，就用返同一個標準俾貓。每日換 fresh water、定期洗乾淨水碗，比研究「到底要買邊一牌水」實際得多。
想估幼貓每日總水分同食量，可以由計算機先取得一個起點。
開啟 →接貓前，呢幾個位一定要睇一次
- 窗同露台：尤其香港高樓住宅，唔好靠「幼貓咁細應該唔識跳」去判斷安全。
- 洗衣機同乾衣機：平時最好關好門，每次開機前養成望一次入面嘅習慣。
- 雪櫃、櫃同大型傢俬後面：你完全伸唔到手入去嘅位置，接貓前先封好。
- 電線、橡筋、髮圈、絲帶：最麻煩唔係玩爛，而係吞落肚。
- 藥物同清潔用品：最好真正收落櫃，而唔係單純放高少少。
- 花同植物：尤其真正百合類植物對貓風險非常高，有貓嘅屋企最簡單就係唔好放百合。
頭幾日先唔好一次過轉晒所有嘢
如果幼貓原本食緊 A 糧、用緊 A 貓砂，接返屋企第一日最好先照舊。新屋本身已經係一個大轉變。如果同時又轉糧、轉砂、轉碗、轉飲水方法同作息，之後突然軟便、唔食或者唔肯用砂盆，你反而好難知道邊樣影響緊佢。
如果原本食緊嗰包糧就快冇，最實際係先補返同一款，等幼貓 settle 之後先慢慢計劃轉糧。
有啲嘢真係唔使第一日買
例如三四張貓床、大量零食、十幾款玩具、補充劑、自動餵食機、自動砂盆或者大型貓爬架。唔係話唔可以買，而係你連隻貓最後鍾意瞓床、紙箱定窗台都未知。住埋一段時間先買，通常少好多浪費。
唔需要將成間房照到日光日白。維持正常屋企作息就得。頭一兩晚留一盞比較暗嘅小燈方便活動同觀察都可以，但唔係必需品。
唔需要。一個乾淨、穩陣、唔易反嘅水碗已經可以開始。
唔一定。你之後好可能發現，你買咗一張好靚嘅床，隻貓最後揀咗個紙箱。
先睇間房本身安唔安全。如果窗、罅隙、細小物件等仲未處理好，唔好純粹因為想陪幼貓，就一下子開放成間房。
接貓文件都收好
針卡、驅蟲紀錄、單據同晶片號碼，最好一開始就放埋同一個地方。香港持牌賣家出售嘅貓要有晶片，而相關疫苗、驅蟲、治療紀錄同單據亦要寫返同一個晶片號碼，方便核對係咪同一隻貓。
唔一定。香港貓同狗牌制度唔同；晶片本身主要係一組身份號碼，唔係 GPS，亦唔係將主人電話直接寫喺粒晶片入面。
接貓前一晚，check 呢張就夠
- 窗同露台安全
- 危險罅隙封好
- 藥物同清潔用品收好
- 電線、髮圈、橡筋、繩收好
- 有毒植物處理好
- 原本食緊嘅糧準備好
- 原本用開嘅貓砂準備好
- 食物、水同砂盆有固定位置
- 有休息位同 可以匿埋嘅地方
- Carrier 準備好
做到呢度，其實已經可以接貓。你唔需要喺接佢返屋企之前，就先變成一個養貓專家。有啲嘢，真係住埋一齊先會慢慢識。