接貓當日點做？
接貓嗰日，主人通常興奮過隻貓好多。你可能已經諗住返屋企影相、俾幼貓睇新床、陪佢玩，甚至屋企人全部等緊佢返嚟。
但幼貓同一日會經歷離開原本住開嘅地方、入 carrier、坐車、搭 lift，再去到一間完全陌生嘅屋。所以第一日唔需要安排太多節目。簡單啲，反而最好。
由出門口開始，先唔好中途開 carrier
Carrier 最重要係穩陣、通風，同埋扣好／關實。入面可以放原本有熟悉氣味嘅毛巾或者墊。
有啲幼貓一上車會叫。主人一聽到，好自然會諗：「不如抱出嚟啦，佢好慘。」唔好。停車場、馬路邊、的士、私家車，都唔係適合開 carrier 嘅地方。
一隻受到驚嚇嘅貓突然衝出去，速度可以快到你反應唔切。就算幼貓一路叫，都等返到屋企、入到安全房間、關好門先開 carrier。
搭車返屋企，要唔要不停氹幼貓？
唔使。你可以輕聲同佢講兩句，但唔需要一路伸手入 carrier 摸。Carrier 放穩、車內唔好太嘈，避免突然好大聲音樂。
如果幼貓比較緊張，可以用毛巾遮住 carrier 部分視線，但要保持足夠通風。幼貓叫唔代表一定非常驚；完全唔叫亦唔代表冇壓力。
入屋之後，唔好即刻抱住幼貓行一圈
直接拎去預先準備好嘅房或者 安靜嘅空間，關好門、確認窗戶安全，再將 carrier 放低。開門之後，俾幼貓自己決定幾時行出嚟。
有啲五秒就出，有啲會坐喺 carrier 入面半個鐘，有啲甚至會喺入面瞓。都唔需要拉佢出嚟。Carrier 可以暫時繼續放喺房入面，當成其中一個 可以匿埋嘅位置。
唔使。你可以坐喺附近做自己嘢，間中同佢講兩句。幼貓望你，就俾佢望；行過嚟，就伸隻手俾佢聞。唔需要每次幼貓一行近，就即刻捉上手抱。
有時幼貓最快學識信任你嘅方法，就係發現：行近你唔代表一定會俾人捉住。
第一日唔使搞「歡迎儀式」
家人想見幼貓好正常，但真係唔需要「你抱完到我抱」、不停叫佢個名，或者即刻擺上梳化影全家福。第一日先俾佢認識最常照顧佢嗰一兩個人，親戚朋友遲兩日先上嚟，完全唔遲。
第一餐，照返原本食緊嘅嘢
第一日唔係 buffet。唔需要因為「今日特別日子」，又開罐頭、又開零食、又試新糧。照返原本食開嘅食物就得。
有啲幼貓有人望住就唔食，等你行開反而自己慢慢食。如果想知道佢實際食咗幾多，可以先量好份量，之後再睇剩幾多。
MEWDAY記低頭幾日食量同體重之後再睇返係一次少食，定係連續幾日一路下降。
開啟 →第一日需唔需要沖涼？
正常情況唔需要。如果幼貓身上冇污糟到真係需要清潔，啱啱搬屋又即刻沖涼、吹毛，只係一次過再加多樣嘢俾佢適應。沖涼唔係「入屋儀式」。
屋企本身有貓，今日唔使急住相認
「兩隻都好乖，應該冇問題。」呢句我哋聽過好多次。但兩隻平時都好乖，唔代表第一次突然面對陌生貓一定冇反應。
新貓先有自己嘅空間，等雙方先熟習對方氣味，再一步一步介紹。介紹得快，唔代表關係建立得快。
如果幼貓已經開始周圍探索，而且明顯有興趣，可以陪佢玩。如果仲匿緊，就唔使拎住玩具不停喺面前搖。
唔一定。最重要係環境安全，有水、食物、砂盆，而且你之後仲 check 到佢狀態。有啲幼貓有人喺附近會安心啲；有啲反而冇人望住先敢出嚟。
返屋企 → 入 安靜嘅空間 → 開 carrier → 俾幼貓自己出嚟 → 確認食物、水同砂盆位置 → 安靜啲。
第一日唔需要完成「同主人建立感情」呢個任務，亦唔需要幼貓即刻表現返你之前見到嘅性格。俾佢時間，唔代表你乜都唔做，只係唔迫佢跟你嘅速度。